នារី​វ័យ​ក្មេង​ដែល​លោត​ទឹក​ពី​លើ​ស្ពាន​ជ្រោយ​ចង្វា​រក​ឃើញ​សព​ហើយ (មានវីដេអូ)

ខេត្តកណ្តាល ៖ យុវនារីម្នាក់ដែលលោតទឹកសម្លាប់ ខ្លួនពីលើស្ពានជ្រោយចង្វា កាលពីប៉ុន្មានថ្ងៃមុន ឥឡូវបានអណ្តែតហើយ និងត្រូវរកឃើញកប់ក្នុងដុបកំប្លោកមុខវត្តពាម (នៅទល់មុខសង្កាត់ព្រែកព្នៅ) បង្កឱ្យមានការភ្ញាក់ផ្អើលកាល ពីវេលាម៉ោងប្រហែល១២ថ្ងៃត្រង់ ថ្ងៃទី២១ កក្កដា ២០១៣ ស្ថិតក្នុងភូមិពាម ឃុំសំបួរមាស ស្រុកមុខកំពូល ។

សពនារីវ័យក្មេងម្នាក់នេះត្រូវ បានគេស្គាល់ឈ្មោះ តឹប គឹមហៀង អាយុ១៨ឆ្នាំ ជានិស្សិតឆ្នាំទី១នៃវិទ្យាស្ថានសេដ្ឋកិច្ច និងហិរញ្ញវត្ថុ មានទីលំនៅភូមិប៉ាហ៊ីត្បូង សង្កាត់ប៉ាហ៊ី ក្រុងប៉ៃលិន ខេត្តប៉ៃលិន បច្ចុប្បន្នស្នាក់នៅ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។ ក្រុមគ្រួសារសពនារីរងគ្រោះបានឱ្យដឹងថា មូលហេតុដែលបណ្តាលឱ្យនារីរូបនេះលោត ទឹកសម្លាប់ខ្លួនដោយសារតូចចិត្ត នឹងខ្លួនមានជំងឺប្រចាំកាយ តែងតែសន្លប់ជាញឹកញាប់ ហើយនៅមុនថ្ងៃកើតហេតុ ប្រហែល១សប្តាហ៍នាងបាន ដួលសន្លប់នៅក្នុងសាលា។

បច្ចុប្បន្នសពនារីរងគ្រោះត្រូវក្រុម គ្រួសារសាច់ញាតិរបស់ នាងចាត់ចែងយកទៅធ្វើ បុណ្យតាមប្រពៃណីហើយ។

គួររំលឹកផងដែរថា កាលពីវេលាម៉ោង៣រសៀល ថ្ងៃទី១៩ កក្កដា ២០១៣ កន្លងមក គេឃើញនារីម្នាក់ជិះម៉ូតូម៉ាកហ្វីណូ ពណ៌ក្រហមលាយស ពាក់ស្លាកលេខភ្នំពេញ១V៥៥៥៩ ខណៈពេលទៅដល់លើស្ពានជ្រោយ ចង្វារក៏បានចុះពីលើម៉ូតូឡើងលើបង្កាន់ ដៃស្ពានរួចលោតសម្លាប់ ខ្លួនលិចបាត់ទៅក្នុងទឹកតែម្តង៕

ប្រភពពី កោះសន្តិភាព