រថយន្តដឹកទឹកកក បុកក្មេងស្រី កិនក្បាលកល់ជាប់កង់រថយន្ត

ភ្នំពេញ: ​កុមារី​អាយុ​៦​ឆ្នាំ​ម្នាក់ ត្រូវបាន​រថយន្ត​ដឹក​ទឹកកក បុក​ដួល​កិន​ក្បាល កល់​ជាប់​ក្រោម​រថយន្ត​ប៊ិះ​ស្លាប់ កាលពី​វេលា​ម៉ោង​៨ និង​៣០​នាទី​ព្រឹក ថ្ងៃទី​១២​ខែកក្កដា ឆ្នាំ​២០១៣ នៅតាម​បណ្តោយ​ផ្លូវ​បេតុង ភូមិ​តា​ងួន សង្កាត់​កា​កាប ខណ្ឌ​ពោធិ​សែន​ជ័យ​។​

 កុមារី​រងគ្រោះ​ឈ្មោះ​ប៊ុ​ក សុ​គ្ធ​នា​នី ស្នាក់នៅ​ភូមិ​ចំការឪឡឹក សង្កាត់​កា​កាប​។ ចំណែក​តៃកុង​រថយន្ត​បង្ក ត្រូវ​សមត្ថកិច្ច​ចាប់ខ្លួន ប៉ុន្តែ​ពុំទាន់​ស្គាល់ឈ្មោះ ព្រោះ​ស្ថិតក្នុង​ដំណាក់កាល​សាកសួរ​នៅ​នគរបាល​ខណ្ឌ​ពោធិ​សែន​ជ័យ​។ រថយន្ត​បង្ក Fromrier ពណ៌​ស ស្លាក​លេខ​ភ្នំពេញ 2Q 7322​។​

​ស្រី​ឈ្មោះ​ស៊ុន ធារ៉ា អាយុ​៤០​ឆ្នាំ ជា​ម្តាយ​ក្មេង​កុមារី​រងគ្រោះ បាន​និយាយថា បាន​ដឹក​កូនស្រី​ទៅ​រៀន​តាមផ្លូវ​បេតុង ពី​លិចទៅ​កើត មកដល់​ផ្លូវបំបែក​ជា​បួន ក៏បាន​ឈប់ ស្រាប់​តែមាន​រថយន្ត​ដឹក​ទឹកកក បើក​ពី​ត្បូង​ទៅ​ជើង បុក​ទាំង​កំរោល​តែម្តង ហើយ​រថយន្ត​បាន​កិន​ក្បាល​កូនស្រី កល់​ជាប់​ពីក្រោម​រថយន្ត ហើយក៏​រថយន្ត​បាន​ឈប់​។

​ស្រី​ឈ្មោះ​ស៊ុន ធារ៉ា បាន​បន្តថា “​ក្នុងពេលនោះ បើ​រថយន្ត​មិន​ឈប់​ទេ ច្បាស់​ជា​កិន​កូនស្រី​ស្លាប់​ជាមិនខាន​ឡើយ​”៕

ប្រភព CEN